Friday, September 24, 2021
Blog

Sosten finansiero na esnan di ménos rekurso den nos komunidat


Apresiabel señor(a) Minister,

Den kuadro di e sosten finansiero ku Gobièrnu a duna na personanan den komunidat ku a pèrdè trabou suskrito Maria Nita miembro di Parlamento pa Movementu Futuro Kòrsou (MFK) a risibí keho di diferente persona den nos komunidat ku tin hopi reklamo riba e sosten ku nan ta risibí. E sosten aki ta hopi importante pa abitantenan di Kòrsou relashoná ku e Pandemia di Covid-19 i komo un frakshon responsabel, hasiendo uso di artíkulo 96 di reglamento di Orden, mi ta hasi e siguiente preguntanan pa Minister di Desaroyo Sosial, Labor i Bienestar, Hensley Koeiman.

Foto google
  1. Suskrito lo ke sa e kantidat di petishonnan ku gobièrnu a risibí for di Mart 2020 te ku mei 2021?
  2. Tambe nos ke sa kua kuantu di e petishonnan aki a keda honra i pa kuantu tempu?
  3. Kuantu persona tin riba e lista di espera i kon ministerio ta atendiendo ku esakinan?
  4. Aparte di esaki nos kier sa kuantu pakete di kuminda a keda repartí i kon?
  5. Suskrito a tuma nota ku entrante promé di Mei 2021, maneho di ayudo di emergensia pa alimento ku Ulanda a enkargá Krus Kòrá kuné, a keda traspasá den man di gobièrnu komo ku ta trata awor di un ayudo struktural?
  6. Tambe nos kier sa kon ta bayendo ku kontinuidat pa entrega di pakete di sosten na e abitantenan ku ta dependé di e ayudo aki?
  7. Kuantu persona a akudí den e periodo ariba menshoná na Ban Bario Bek pa un sosten finansiero, konosí komo “onderstand” i tambe kon e proseso di petishon pa sosten “online” a kana?
  8. Suskrito ta enfatisá ku ta hopi importante pa duna “stand van zaken” pa asina por midi e impakto sosial-ekonómiko ku a afektá hopi kas di famia i persona individual?
  9. Ta hopi persona ta komentá ku e ayudo no ta sosodé riba un base struktural i ku uso di karchi sosial no tur ora ta bon reglá. Si nos por a tuma nota ku ta tildá e usuarionan di ta hasi mal uso di ayudo sosial. E pregunta ta, ken ta responsabel pa kontrolá e proseso?
  10. Tin gritunan di desesperashon pa motibu ku tin persona, famia per espesial muchanan, pasando hamber riba nos pais?
    Pa medio di esaki mi ta urgi señor Koeiman pa duna aklarashon riba preguntanan di preokupashon di nos frakshon pa asina por sirbi esnan den nesesidat mas mihó. Nos ta finalisá bisando ku no por ta asina ku tin hende riba e pida baranka aki ta drumi
    sin kome, no por ta asina ku tin persona ku sí ta haña yudansa i tin otro ku tin lunanan largu riba lista di espera. No por ta asina ku tin famianan ku yu chikí sin posibilidat pa kumpli ku nesesidatnan básiko. Den 2021, komo un pais den Reino Ulandes, ku ta suponé di ta un estado di bienestar sosial, e situashon aki ta inakseptabel.
    Atentamente

Maria Nita
Parlamentario pa
Frakshon di MFK

REFINERIA DI KORSOU I CORC B.V. A YEGA NA AKUERDO PA MANEHO I OPERASHON DI NOS FASILIDATNAN PETROLERO

Un kontrakt di 60 aña

Foto Refineria di Kòrsou-foto:source google

Willemstad 21.- Ku un akuerdo di 60 aña refineria di Kòrsou (RdK) i CORC B.V. awe a firma un “Draft Deed.” E akuerdo aki ta forma base pa un traspaso di maneho i operashon di nos refineria, e planta di utilidat i e terminal na Bullenbaai. Huntu ku e “Draft Deed” a firma tambe un “Binding Closing Agreement” den kual tin stipula kondishonnan ku mester kumpli kun’é promé ku e traspaso tuma luga. Den e “Draft Deed” partidonan a kumbiní tur detaye pa e traspaso di e fasilidatnan petrolero por tuma lugá. Hunta di Komisario di RdK i akshonista (gobièrnu) lo mester aprobá e akuerdo aki ku despues lo bira un akta formalisá dor di un notario.


Pa loke ta trata e “Binding Closing Agreement”, tin varios kondishon inkluí pa por yega na un traspaso definitivo di e fasilidatnan. Asina por ehempel un di e kondishonan ta, ku CORC mester yega na un akuerdo ku Gobièrnu di Kòrsou tokante varios aspekto manera kumplimentu ku leinan di medio ambiente i fasilidat fiskal. Tambe lo mester yega na akuerdo ku kompanianan di Gobièrnu ku ta dunaservisio di sosten na operashon di e fasilidatnan petrolero òf ta depende di operashon di e fasilidatnan petrolero pa asina nan por sirbi nos komunidat. E negosashon entre RdK i CORC a inisiá na komienso di e aña aki despues ku CORC a keda skohé for di un grupo di diferente otro partido. A skohe CORC, komo e partido preferí pa negosha kun’é.

Ku e akuerdonan ku awor a keda firmá, a yega na final di e proseso di negosashon entre RdK i CORC. CORC awor lo sigui negoshá ku e tim negoshado di Gobièrnu di Kòrsou. Tantu Gerensha di RdK komo CORC ta kontentu di e yega na e akuerdo importante pa un traspaso di maneho i operashon di Kòrsou su fasilidatnan petrolero rumbo pa un futuro nobo i prometedó.

Kòrsou mester habri pa tur esnan ku a bakuna i asina kuminsá katalisá nos ekonomia i turismo.

Mundialmente e sektor turístiko a keda afektá pa motibu di e pandemia di COVID19 di kual ta e sektor ku a haña e sla di mas duru unda mayoria hende a pèrdè trabou direpiente. Kòrsou no ta un eksepshon despues ku na aña 2020 durante e promé “lockdown “ di un forma rápido nos por a mira kon e sektor aki i otro nan a kai den otro ku konsekuensia ku míles di kuponan i futuro kuponan di trabou a desaparesé aki na Kòrsou. For di na kabamentu di aña 2020 diferente pais na mundu a kuminsá bakuna i asina krea perspektiva pa ku salubridat i pa ku ekonomia mundial. Mirando e éksito di bakunashon ya bo ta mira pais manera Grecia, Spaña i Bahama’s ku e sektor di turismo ta importante pa nan ekonomia a anunsiá ku nan porta ta habri pa tur turista ku por prueba ku nan a bakuná.

Esaki ta e momento mirando e velosidat ku bakunashon ku ta tumando lugá aki na Kòrsou i nesesidat pa kuminsá katalisá nos ekonomia, Kòrsou tambe mester dal e stap “bold “ aki i anunsiá ku tur hende ku a bakuna ta bon bini i asina lanta e sektor aki ku ta krea míles di empleo pa mamanan ,tatanan i hobenan den e bunita sektor aki ku hopi aktualmente ta dependé di Gobièrnu. Ta demostrá ku turismo ta e mekanismo despues di un krísis ku hopi rápido ta yuda paisnan kuminsá rekuperá ekonómikamente.

Ban yama un i tur bon bini basta nan bakuna.

Parlamentario mr. Giselle Mc William

Entrevista Ku ta start ku su kampaña pa rekouda fondo

Rotterdam, 28 april 2021 – Desde awe Entrevistaku ta abilitá e posibilidat pa por hasi donashon. Nos tin hopi plannan pa hasi e plataforma aki mas sólido i pa esaki nos tin mester di bo kolaborashon.

Duna bo sosten pa nos sigui duna bo mas i mas Entrevista. Ya pa mas ku un (1) aña nos ta dunando bo programanan di kalidat i edukativo. Un Tim ku realmente stima komunikashon ta den bo kas tur dia i pa nos sigui desaroyá nos materialnan pa nos ekipo, nos mester di bo sosten.

Si bo ta na Hulanda, sostené nos pa medio di e link, klek aki. Nos ta apresiá i balora bo sosten imensamente.

CMC ta tuma pasonan kouteloso pa start bèk ku kuido elektivo

Willemstad, 28 di Aprel 2021 – Ku bahada di kasonan di pashènt ku COVID-19 den hòspital, Curaçao Medical Center (CMC) a kuminsá plania pa start bèk ku tratamentunan elektivo i sitanan na poliklínikanan i alabes permití bishita na pashènt. Den e último luna mester a para tur sita, tratamentu i sirugia ku no ta esensial òf di emergensia pa por a habri espasio pa kuido di COVID-19. Ku e kantidat di kasonan di COVID-19 den hòspital bou di 50 na e momentunan aki, algun espasio i personal a bira disponibel pa start bèk ku kuido regular. Alabes mester kuminsá traha pa redusí e lista di espera di operashonnan di 1,432 ku a bin ta akumulá.

E promé pashèntnan pa operá ta esnan mas krítiko di onkologia, tratamentu di kanser. Departamentunan di poliklínika ku eksepshon di Pulmonologia i Medisina Interno di CMC lo yama tur pashènt di kual nan sita a wòrdu kanselá pa por reprogramá esakinan mas pronto posibel. Sitanan ku Pulmonologia i Medisina Interno mester warda un ratu mas debí ku e departamentunan aki ta dediká na pashèntnan di COVID-19 interná ainda.
E reglanan ku ta keda na vigor:

  1. Ta permití solamente UN bishita (18+) entre 3pm – 4pm pa kada pashènt ku no ta relatá na COVID-19 a base di plachi di dia. Pa pashèntnan ku COVID-19: E persona di kontakto, por yama 745-0045 pa un update pa medio di e proyekto di “Keda Konektá.”
  2. Solamente un persona (18+) por kompañá un pashènt na nan sita si esaki ta nesesario
  3. Pa drenta hòspital: Mester bisti Tapa boka, mantené distansia físiko i higiene di man.

E tim di bakunashon huntu ku ABC Busbedrijf ta transportá bo grátis pa bai bakuná

28 April 2021 dor di Ministerio Asuntunan General i Promé Minister

Willemstad – Tim di Bakunashon, bou di guia di Epidemiólogo Irálice Jansen, huntu ku ABC Busbedrijf ta ofresé transporte grátis pa komunidat por bai bakuná. Den un periodo di tres dia ta bai kubri e áreanan di Bandabou, Mei Mei i Bandariba ku e propósito pa tur persona ku ta deseá di bai bakuná, por haña e posibilidat di yega Sentro di Bakunashon sin ningun gastu adishonal. Riba tur ruta stipulá, tin vários parada kaminda habitantenan por subi e bùs rumbo pa Sentro di Bakunashon.

Gobièrnu di Kòrsou ta konsiente ku por tin vários opstákulo ku por pone ku un persona ku ke bakuná, no ta logra registrá òf no ta logra yega na un di Sentronan di Bakunashon. Algun di e motibunan aki por ta relashoná ku e situashon sosio-ekonómiko òf mobilidat di e persona. Pa por yuda kita algun di e bareranan akí, e tim di bakunashon, huntu ku ABC Busbedrijf ta bai pone algun bùs riba rutanan spesífiko pa por transportá habitantenan ku ta deseá esaki, grátis pa Sentro di Bakunashon. 

Djaweps, 29 di aprel 2021: Ruta Bandabou

Riba djaweps, 29 di aprel 2021, e transporte grátis pa Sentro di Bakunashon ta kubri e área di Bandabou. Tin dos ruta diferente ku e bùsnan lo kubri, ku ta salida for di Misa di Westpunt i salida for di Landhuis Knip i tur dos ta bai Sentro di Bakunashon Sambil.
Orarionan di salida pa tur dos ruta ta 9’or di mainta, 12’or di mèrdia i 3’or di mèrdia.
Bùsnan ta sali bèk for di Sentro di Bakunashon Sambil pa 11’or di mainta, 2’or di mèrdia i 5’or di atardi.

Djabièrnè, 30 di aprel 2021: Ruta Mei Mei

Riba djabièrnè, 30 di aprel 2021, e transporte grátis pa Sentro di Bakunashon ta kubri e área Mei Mei. Tin dos ruta diferente ku e bùsnan lo kubri, ku ta salida for di Post Otrobanda i salida for di Retònde di Zegu i tur dos ta bai Sentro di Bakunashon Sambil.
Orarionan di salida pa tur dos ruta ta 9’or di mainta, 12’or di mèrdia i 3’or di mèrdia.
Bùsnan ta sali bèk for di Sentro di Bakunashon Sambil pa 11’or di mainta, 2’or di mèrdia i 5’or di atardi.

Djaluna, 3 di mei 2021: Ruta Bandariba
Riba djaluna, 3 di mei 2021, e transporte grátis pa Sentro di Bakunashon ta kubri e área di Bandariba. Tin dos ruta diferente ku e bùsnan lo kubri, ku ta salida for di Festival Center i salida for di Montaña i tur dos ta bai Sentro di Bakunashon SDK.
Orarionan di salida pa tur dos ruta ta 9’or di mainta, 12’or di mèrdia i 3’or di mèrdia.
Bùsnan ta sali bèk for di Sentro di Bakunashon SDK pa 11’or di mainta, 2’or di mèrdia i 5’or di atardi.

E transporte ta únikamente ida i buèlta pa Sentro di Bakunashon, pues asina bo subi e bùs for di un di e paradanan pa bai bakuná, bo no por baha ningun otro kaminda ku no ta na e Sentro di Bakunashon. Na momentu di regreso for di e Sentro di Bakunashon, un persona por baha atrobe na e mesun parada kaminda el a subi.

Na yegada, e tim di Bakunashon ta registrá tur persona i duna e guia nesesario pa asina tur persona kaba di bakuná, por subi e mesun bùs bèk. 

Personanan ku ta hasi uso di remedi pa hasi sanger delega (antistolling), mester yama 9345 pa traha un sita promé ku presentá pa bakuná. Esaki ta sirbi, pa e persona por risibí indikashonnan spesífiko promé ku e risibí su bakuna.

Pa download e ruta di Bandabou, klek aki,
pa download e ruta di Mei Mei, klek aki i
pa download e ruta di Bandariba, klek aki.

Tur e rutanan di kada dia, lo ta optenibel tambe riba kanalnan ofisial di Gobièrnu di Kòrsou. 

Gobernador a pidi Peterson bira formador

Foto: Di Amigoe

28 April 2021 dor di Ministerio Asuntunan General i Promé Minister

Awe mèrdia Gobernador di Kòrsou, señora L.A. George-Wout, a pidi señor C.H. Peterson pa komo formador e pasa na forma un gabinete ku por konta ku sosten di e partidonan polítiko Movementu Futuro Kòrsou (MFK) i Partido Nashonal di Pueblo (PNP).

E gabinete nobo ku ta bai forma awor lo mester konsistí di persona dispuesto i kapas di implementá di forma íntegro, desididu i balansá e akuerdo di gobernashon ku ainda mester kaba di finalisá. A pidi señor Peterson pa e sigurá ku den e akuerdo di gobernashon ta dediká atenshon di forma konkreto, na e retonan anteriormente menshoná den e enkargo di informashon (esta: redusí pobresa, rekuperá finansa públiko, desaroyá ekonomia, mehorá edukashon, rekuperá infrastruktura, mehorá atenshon médiko i lucha ku efikasia kontra kriminalidat).

En bista di urgensia di e problemanan ku e gabinete nobo lo enfrentá i e tantísimo asuntunan koriente, a pidi tambe pa konsiderá ku den e akuerdo di gobernashon ta dediká e atenshon nesesario na e forma ku e gabinete nobo tin plan di deliniá e forma di kooperashon denter di Reino. A enfatisá ademas ku ta di gran importansia pa e polítika ku gobièrnu ta bai hiba ta kontribuí na perspektiva pa pueblo i ta kondusí na stabilidat i trankilidat den nos komunidat.

pidi señor Peterson ademas pa e sigurá ku ora ta forma gobièrnu ta tene kuenta ku ta kumpli debidamente ku e Ordenansa Nashonal riba Integridat di Ministernan (kandidato).

Señor Peterson a tuma e enkargo pa forma gobièrnu na konsiderashon i lo e reportá e resultado na Gobernador pa mas tardá dia 19 di mei i lo e tene Gobernador na altura di progreso di su trabou.